پاکستان سے زیاد ہ اس وقت بھارت سکیورٹی رسک ہے :احسان مانی 208

پاکستان سے زیاد ہ اس وقت بھارت سکیورٹی رسک ہے :احسان مانی بنگلادیش کو ثابت کرنا ہوگا کہ پاکستان محفوظ ملک نہیں: چیئر مین پی سی بی

پاکستان سے زیاد ہ اس وقت بھارت سکیورٹی رسک ہے :احسان مانی
بنگلادیش کو ثابت کرنا ہوگا کہ پاکستان محفوظ ملک نہیں: چیئر مین پی سی بی
پاکستان کرکٹ بورڈ (پی سی بی) کے چیئر مین احسان مانی نے دو ٹوک الفاظ میں کہا کہ پاکستان اب ہوم سیریز نیوٹرل مقام پر نہیں کھیلے گا، بنگلادیش کو ثابت کرنا ہوگا کہ پاکستان محفوظ ملک نہیں ہے۔سرلنکا کے دورہ پاکستان کے دوران دوسرے اور آخری ٹیسٹ میں قومی ٹیم کی فتح کے بعد نیشنل سٹیڈیم، کراچی میں پریس کانفرنس کرتے ہوئے چیئرمین پی سی بی احسان مانی نے سری لنکن ٹیم کا شکریہ ادا کیا کہ ان کی آمد سے پاکستان میں دس سال بعد ٹیسٹ کرکٹ کی واپسی ہوئی۔
انہوں نے کہا کہ اس دورے سے دنیا میں یہ پیغام گیا ہے کہ اب پاکستان انٹرنیشنل کرکٹ کےلئے ایک محفوظ ملک ہے،سری لنکا کا پاکستان آکر ٹیسٹ میچ کھیلنا ہماری بڑی کامیابی ہے جب کہ راولپنڈی اور کراچی میں ٹیسٹ میچ ہونا ٹرننگ پوائنٹ ہے۔
انہوں نے بتایا کہ پی سی بی بنگلا دیش کرکٹ بورڈ سے رابطہ میں ہے اور امید ہے کہ وہ پاکستان نہ آنےکی کوئی وجہ نہیں ڈھونڈیں گے۔

انکا مزید کہنا تھا کہ اگر بنگلادیش کی ٹیم نہیں آئی تو معاملہ آئی سی سی ڈسپیوٹ میں بھی جاسکتا ہے لیکن فی الحال بات چیت جاری ہے اس لیے مزید تبصرہ نہیں کرسکتے،اس وقت پاکستان سے زیادہ بھارت سکیورٹی رسک ہے ۔احسان مانی نے کہا کہ پاکستان کرکٹ بورڈ کے معاملات میں کسی کی مداخلت شامل نہیں۔ میرا خود سلیکشن کمیٹی کے معاملات میں عمل دخل نہیں ہے۔
74سالہ احسان مانی کا مزید کہنا تھا کہ بعض لوگ انہیں زیادہ عمر ہونے کا طعنہ دیتے ہیں لیکن وہ انہیں بتانا چاہتے ہیں کہ وہ اس وقت بھی اتنے فٹ ہیں کہ پہاڑ چڑھ سکتے ہیں،ان پر تنقید ضرور کی جائے لیکن حقائق جاننا بھی لازمی ہے۔انہوں نے مزید کہا کہ وہ آئی سی سی کے ساتھ کافی عرصے تک منسلک رہے اس لیے جو ممالک کہتے ہیں کہ وہ سیکورٹی خدشات پر یہاں نہیں انا چاہتے تو وضاحت دیں۔

اس خبر پر اپنی رائے کا اظہار کریں

اپنا تبصرہ بھیجیں